جۋىردا ءابۋ دابيدە قازاقستاننىڭ بىرىككەن اراب امىرلىكتەرىندەگى ەلشىسى قايرات لاما شاريف ءباا پرەزيدەنتى اكىمشىلىگى باسشىسىنىڭ ورىنباسارى احمەد جۇما ءاز-زاعابيمەن كەزدەسىپ, ەكى مەملەكەت قاتىناستارىن ودان ءارى دامىتۋ جانە تەرەڭدەتۋ توڭىرەگىندە پىكىر الماستى, دەپ حابارلادى ءسىم-ءنىڭ ءباسپاسوز قىزمەتى.
قازاقستاندىق ديپلومات دۋباي حالىقارالىق قارجى ورتالىعى ۇلگىسى نەگىزىندە استانا حالىقارالىق قارجى ورتالىعىن قۇرۋ تۋرالى قازاقستان پرەزيدەنتى نۇرسۇلتان نازارباەۆتىڭ باستاماسىن بىرلەسىپ ىسكە اسىرۋ ەكىجاقتى ىنتىماقتاستىققا جاڭا سەرپىن بەرەتىنىن اتاپ ءوتتى.
احمەد جۇما ءاز-زاعابي ءوز كەزەگىندە استانادا بوي كوتەرىپ كەلە جاتقان «ءابۋ دابي پلازا» كەشەنىن ەكى ەل باسشىلارى اراسىنداعى شىنايى دوستىقتىڭ جانە قارقىندى مەملەكەتارالىق ىنتىماقتاستىقتىڭ جارقىن بەلگىسى رەتىندە باعالادى. سونىمەن قاتار, قازاقستان رەسپۋبليكاسىنىڭ پرەزيدەنتى ن.نازارباەۆ پەن ءباا پرەزيدەنتى شەيح حاليفا بەن زايد ءال-ناحاياننىڭ اراسىنداعى ءوزارا ۋاعدالاستىقتىڭ ارقاسىندا استانا قالاسىندا قازاقستان-امىرلىكتەر زياتكەرلىك ورتا مەكتەبىنىڭ قۇرىلىسى باستالدى. شەيح حاليفا اتىنداعى قايىرىمدىلىق قورى 13 ملن. اقش دوللارى كولەمىندە تەگىن گرانت ءبولىپ, مەكتەپ قۇرىلىسىنىڭ جوباسىن استانا قالاسى اكىمدىگىمەن بىرلەسىپ ىسكە اسىرۋدا.
كەزدەسۋ سوڭىندا ق.لاما شاريف سۇحباتتاسىنا قازاقستان رەسپۋبليكاسى كونستيتۋتسياسىنىڭ 20 جىلدىعىنا ارنالعان مەرەكەلىك شارالارعا قاتىسۋعا قازاقستاندىق تاراپتىڭ رەسمي شاقىرۋىن تابىس ەتتى. شاقىرۋ زور ريزاشىلىقپەن قابىل الىندى.
«ەگەمەن-اقپارات».